Tveir Hjólamenn, þeir Guðni Páll Daníelsson og Brad Evans, taka þátt í á morgun einni stærstu almenningshjólreiðakeppni sem haldin er, eða Étape du Tour. Ár hvert er hinum almenna hjólreiðamanni boðið að hjóla eina dagleið úr Tour du France sem atvinnumennirnir hjóla nokkrum dögum síðar. Í fyrra tóku um 7500 hjólreiðamenn þátt í Étape og búast má við svipuðum fjölda í ár.

Í ár verður 10. dagleiðin úr túrnum, Pau - Hautacam, hjóluð. Umrædd dagleið er fyrsta alvöru fjalladagleiðin í túrnum og endar í Pýreníafjöllunum. Þó að hún sé "einungis" 165 km löng að þá eru tvö HC klifur á leiðinni og er því mjög krefjandi. Það fyrsta, Col du Tourmalet (23,4 km - 7,5%) kemur eftir 117 km og dagleiðin endar á klifri upp í skíðabæinn Hautacam (15,2 km - 7,2%). Það má því búast við miklum átökum á morgun og við óskum þeim Guðna Páli og Brad góðs gengis í Frakklandi.